Litvanın prezidenti Gitanas Nauseda fiqurlu konkisürən Marqarita Drobyazkonu ölkə vətəndaşlığından məhrum edib.
Busaat.az xəbər verir ki, bu barədə ölkənin ELTA agentliyi məlumat yayıb.
“Bəli, bu gün prezident müvafiq fərmanı imzalayıb”, – mənbə Litva prezidentinin müşaviri Ridas Jasiulionisin şərhindən sitat gətirib.
2022-ci ilin avqustunda Nauseda Ukrayna hadisələri fonunda Soçidə Olimpiya çempionu Tatyana Navkanın “Qu gölü” şousunda göstərdikləri performansa görə Marqarita Drobyazko və Povilas Vanaqası dövlət mükafatlarından məhrum etmək qərarına gəlib.
51 yaşlı Drobyazko 1993-cü ildə Vanaqasla bir araya gəlmək üçün qeyri-adi bir hərəkətlə Litva vətəndaşlığı aldı. Onlar birlikdə beş Olimpiya buz rəqsi yarışmasında (1992, 1994, 1998, 2002, 2006) iştirak edib və duetin ən yaxşı nəticəsi 2002-ci il Oyunlarında beşinci yeri tutması olub. Drobyazko on üçqat Litva çempionu, ikiqat Avropa çempionatının bürünc mükafatçısı və dünya çempionatının bürünc mükafatçısıdır.
2000-ci ildə Drobyazko və Vanaqas Litvaya görkəmli xidmətlərinə görə prezident mükafatı olan Litva Böyük Hersoq Gediminas ordeni ilə təltif olunublar.
