Müştəri “Kontakt Home” mağazalar şəbəkəsindən (“ABC Telecom” MMC) 400 manata televizor alıb, “Yelo Bank” ASC ondan 4360 manat tələb edib.
Bu barədə Bakıvaxtı.az-a vətəndaş Mürsəlov Zamin Saqi oğlu bildirib.
O qeyd edib ki, 2019-cu ilin sentyabr ayında “Kontakt Home”dan televizor alıb: “Televizor “Yelo Bank” (keçmiş “Nikoil” bank) vasitəsilə kreditlə alınıb. 400 manat kredit götürülüb. Borcun 200 manatı ödənilib. Qalan məbləğ pandemiya, müharibə vaxtına düşüb deyə gecikmə olub.
Bu gün “Yelo Bank”a məbləğin tam ödənilməsi üçün müraciət etdikdə onlar borcun 4360 AZN olduğunu dedilər. Bəli, gecikmə var. Amma bu günə qədər məhkəmə qərarı, çağırış, bankdan bildiriş falan olmayıb. 200 manat hansı yolla 4360 AZN ola bilər? Bankdan bildirdilər ki, müqavilə əsasında hər gecikən günə görə 180 faiz dəbbə hesablanıb”.
“Yelo Bank”da Bakıvaxtı.az-a bildirilib ki, “Yelo Bank” Z.Mürsəlova kredit verməyib: “Krediti başqa təşkilat verib. “Yelo Bank” həmin təşkilatdan kredit portfelini alıb. Məsələ araşdırılır, müştəri ilə əlaqə saxlanılacaq”.
