MÜSTƏMLƏKƏ, YOXSA TƏRƏFDAŞ?: “Fransadan Ermənistana fayda gəlmədiyini görmək üçün...” - ŞƏRH

“Fransanın tarix boyu yürütdüyü siyasətin motivində müstəmləkəçilik amili dayanır”.

Bunu “Fransanın Qarabağa gəlmək istəyi nədir?” sualını cavablandıran siyasi şərhçi Elçin Mirzəbəyli Busaat.az-a açıqlamasında deyib.

O bildirib ki, Fransanın yalnız Azərbaycana deyil, həm də Türkiyə qarşı maraqları mövcuddur:

“Fransa özünün Cənubi Qafqaz regionunda aktiv iştirakını Türkiyə faktorunun güclənməsi müstəvisindən dəyərləndirir. Bu kontekstdən Fransanın İranla yaxından əməkdaşlıq etdiyinə əmin ola bilərsiniz. Yəni, mahiyyət etibarilə eyni maraqlardan çıxış edirlər. 1979-cu ildə Fransadan gələn şəxsin İranda həyata keçirdiyi hakimiyyət dəyişikliyi indiki dövrdə də Fransa ilə bağlarını qırmayıb. Tarixin bütün dövrlərində Fransanın Cənubi Qafqaz, Mərkəzi Asiya maraqları mövcud olub. Fransa indi də tarixi ənənələrini davam etdirir”.

Siyasi şərhçi Fransanın bölgədəki maraqlarına da toxunub: “Məsələyə daha geniş aspektdən yanaşsaq, pərdənin arxasını görə bilərik. Regionda Azərbaycan-Türkiyə ittifaqının güclənməsinə mane olmaqdan başqa Fransadan Ermənistana heç bir fayda gəlmədiyini anlamaq çətin deyil. Hazırda Ermənistana investisiya yatıran ölkələrin siyahısında Fransanın ən son yerlərdən birində olduğunu nəzərinizə çatdırmaq istəyirəm. Bu, Fransanın Ermənistanı bir dövlət kimi inkişaf etdirmək niyyəti olmadığının sübutudur. Fransanın tarix boyu yürütdüyü siyasətin motivində müstəmləkəçilik amili dayanır. Önəmli olan faktorlardan biri Cənubi Qafqazın zəngin təbii resurslara malik olmasıdır. Azərbaycan Mərkəzi Asiyanın təbii ehtiyatlarına açılan qapıdır. Fransa regionda aparıcı yer almaq üçün Ermənistan amilindən yararlanmağa çalışır”.

Ələsgər / Busaat.az