PKK/YPG  Suriyaya toplaşır

Terror təşkilatı PKK/YPG Suriyadakı işğalını möhkəmləndirmək üçün İraq və İrandan gətirdiyi tərəfdarlarına silahlı təlimlər verir.

Busaat.az xəbər verir ki, separatçı təşkilat 3 yanvardan etibarən İraq və İranda topladığı 1300 kişi və qadın tərəfdarını Suriya ərazisinə keçirdi. Türkiyənin mümkün hərbi əməliyyatına qarşı Aynularabdakı işğalını gücləndirmək məqsədilə tərəfdarlarını Suriyaya gətirərək onları Haseke vilayət mərkəzi və Qamışlı rayonunda topladı. Toplanan terrorçular daha sonra Rəqqa və Deyr əz-Zor bölgələrindəki silahlı təlim düşərgələrinə göndərilir.

Suriyanın üçdə birini işğal altında saxlayan PKK/YPG İraqın şimalından Suriyanın şimal-şərqinə qədər uzanan logistik xətt vasitəsilə terrorçu keçidlərini təmin edir.

Xatırladaq ki, keçən həftə Türkiyənin Xarici işlər naziri Hakan Fidan “Onlara (PKK/YPG-yə) verdiyimiz ultimatumu hər kəs bilir. Amerikalılar vasitəsilə də, mətbuat vasitəsilə də bildirdik. Beynəlxalq terrorçu statusu daşıyan, Türkiyədən, İrandan, İraqdan gəlmiş şəxslərin dərhal Suriyanı tərk etməsi lazımdır” deyə bəyan etmişdi. ABŞ Dövlət Departamentinin Siyasi İşlər üzrə müvəqqəti müdir müavini Con Bass da Türkiyənin təhlükəsizlik narahatlıqlarını anladıqlarını və Suriyada olan xarici terrorçuların ölkəni tərk etməsinin vacibliyini qeyd etmişdi.