“Əminəm ki, Türkiyənin Rusiya-Ukrayna danışıqları ilə bağlı məsələdə xüsusi rolu tələb olunmağa davam edəcək”.
Busaat.az xəbər verir ki, bu fikirləri Rusiya prezidenti Vladimir Putin bildirib.
Putin Türkiyəni həm ikitərəfli əlaqələrdə, həm də beynəlxalq arenada etibarlı tərəfdaş olaraq gördüyünü deyib.
Kremldən verilən məlumata görə, Putin Çinin Tianjin şəhərində keçirilən Şanxay Əməkdaşlıq Təşkilatına (ŞƏT) üzv ölkələrin Dövlət Başçıları Şurasının 25-ci Zirvə Toplantısı çərçivəsində prezident Rəcəb Tayyib Ərdoğanla görüşündən danışıb.
Putin Ərdoğanla konstruktiv və qarşılıqlı hörmətə əsaslanan şəxsi təmaslarını yüksək qiymətləndirdiyini ifadə edərək qeyd edib:
“Bu, mehriban qonşuluq prinsiplərinə və Rusiya-Türkiyə münasibətlərinin ənənəvi dostluq prinsiplərinə tam uyğundur. Biz Türkiyəni həm ikitərəfli münasibətlərdə, həm də beynəlxalq arenada etibarlı və sübut olunmuş tərəfdaş kimi görürük.
Rusiya iki ölkə arasında ticarət-iqtisadi əməkdaşlığın dinamikasından məmnundur. Rusiya-Türkiyə arasında ticarət həcmi keçən il 6,6 faiz, bu ilin birinci yarısında isə təxminən 3 faiz artıb”.
Hökumətlərarası komissiyanın fəal işlədiyini və iyunun sonunda Moskvada son iclasını keçirdiyini qeyd edən Putin həmçinin bildirib: “Qarşılıqlı olaraq irimiqyaslı investisiyalar edilir. Rusiya şirkətləri Türkiyə iqtisadiyyatının metallurgiya və avtomobil sənayesi kimi sektorlarında böyük layihələr həyata keçirir. Türk şirkətləri Rusiyada maşınqayırma, metallurgiya, ağac emalı sahələrində geniş şəkildə təmsil olunur”.
Yeganə
