İsrailin hücumları və blokadası səbəbiylə aclığın yaşandığı Qəzzada son 24 saatda aclıqdan ölənlərin sayı 6 nəfər artaraq 131-i uşaq olmaqla 367-yə çatıb.
Busaat.az xəbər verir ki, Qəzzada Səhiyyə Nazirliyi aclıq və qida çatışmazlığından ölənlərlə bağlı son məlumatları verən yazılı açıqlama yayıb.
Açıqlamada son 24 saatda biri uşaq olmaqla, daha 6 fələstinlinin aclıq və qida çatışmazlığından öldüyü bildirilib. Qeyd olunub ki, 2023-cü il oktyabrın 7-dən Qəzza zolağında aclıqdan ölənlərin sayı 367 nəfərə çatıb ki, onlardan 131-i uşaqdır.
Birləşmiş Millətlər Təşkilatının (BMT) dəstəklədiyi İnteqrasiya edilmiş Qida Təhlükəsizliyi Faza Təsnifatı (IPC) avqustun 22-də Qəzzada aclıq elan etdikdən sonra 16-sı uşaq olmaqla 89 nəfərin aclıq və qidalanmadan öldüyü də bildirilib.
IPC tərəfindən dərc edilən son hesabatda deyilir ki, sübutlar 15 avqust 2025-ci il tarixinə Qəzza şəhərində aclığın fəlakətli olaraq bilinən 5-ci səviyyədə olduğunu təsdiqləyir.
“22 aylıq amansız qarşıdurmadan sonra Qəzza zolağında yarım milyondan çox insan aclıq, yoxsulluq və ölümlə səciyyələnən fəlakətli şəraitlə üzləşib”, – deyə IPC hesabatında qeyd edilir.
Yeganə
