Suriyadakı Müxalif Tərəflərin Barışıq Mərkəzinin hərbçiləri Suriyanın Dəra əyalətindəki Qabaqib qəsəbəsinin mülki əhalisinə humanitar yardım çatdırıblar.
Busaat.az xəbər verir ki, bu barədə TASS sözügedən mərkəzə istinadən məlumat yayıb.
“Qəsəbənin inzibati binasında rus hərbçiləri ümumi çəkisi təxminən üç tona yaxın olan 300 ərzaq paketi paylayıblar. Hər paketdə un, düyü, çay, şəkər və bitki yağı da daxil olmaqla on kiloqrama qədər ərzaq var. Hərbçilər ərzaq dəstindən əlavə, 1500 kiloqram geyim də çatdırıblar”, – deyə məlumatda bildirilir.
Bundan əlavə, humanitar əməliyyat çərçivəsində Dəməşq döyüş qrupunun tibb xidmətinin rəis müavini yerli əhalini müayinə edib. Vətəndaşlara müalicə tövsiyələri və lazımi dərman preparatları verilib. Agentliyin məlumatına görə, yerli dövlət və bələdiyyə orqanları rus hərbçilərinə göstərdikləri köməyə görə təşəkkür ediblər.
“Ümumilikdə, Suriyada Müxalif Tərəflərin Barışdırılması və Qaçqın Hərəkatına Nəzarət üzrə Rusiya Mərkəzinin işi çərçivəsində 3600-ə yaxın humanitar aksiya həyata keçirilib. Suriya vətəndaşlarına 7 min 584 tondan çox ərzaq, qablaşdırılmış su və ilkin tələbat malları çatdırılaraq paylanılıb”, – məlumatda deyilir.
