Serblər geri addım atdı: Kosovo ilə gərginliyə səbəb olan barrikadalar yığışdırılır

Serbiya prezidenti Aleksandar Vuçiç Kosovo ilə gərginliyə səbəb olan barrikadaların qaldırılacağını açıqlayıb.

Busaat.az xəbər verir ki, bu barədə Serbiyanın Kosovo ilə sərhədi yaxınlığındakı Raska kazarmasında kosovo serbləri ilə görüşən Vuçiç görüşdən sonra açıqlama yayıb.

Çox çətin bir gecə və görüş keçirdiklərini ifadə edən Vuçiç deyib: “Kosovo serblərindən barrikadaları aradan qaldırmalarını istədim. Sülh və əmin-amanlığın davam etməsini istədim. Hər kəsi dinlədim. Verilən vədlərin yerinə yetiriləcəyinə inanıram”.
Vuçiç, Kosovo serbləri arasında inamsızlığın davam etdiyini ifadə edib: “Barrikadalar cümə axşamı günortadan əvvəl qaldırılacaq. Bu, 2 saata bitəcək bir iş deyil. 24, bəlkə 48 saat çəkə bilər, amma barrikadalar yığışdırılacaq”.

Barrikadaların qaldırılmasından sonra Kosovo serblərinin nəzarətə alınma ehtimalını qiymətləndirən Vuçiç, “Kosova serbləri dedilər ki, belə bir vəziyyətdə barrikadalar quracaqlar və bir daha qaldırılmayacaqlar” – deyə, bildirib.

Busaat.az