“Azərbaycan Respublikası Ekologiya və Təbii Sərvətlər Nazirliyinin ardından digər qurumlar da hərəkətə keçməlidir”.
Bunu dekabrın 3-də Ekologiya və Təbii Sərvətlər Nazirliyi əməkdaşlarının Xankəndiyə səfərinə münasibət bildirən “Biosfer” İctimai Birliyinin sədri Qorxmaz İbrahimli Busaat.az-a açıqlamasında deyib.
O, bildirib ki, dekabrın 3-ü Azərbaycan dövləti növbəti qəti addım atdı: “Xankəndi şəhəri və digər ərazilərdə yaşayan ermənilərə, onları məqsədli şəkildə gərginlik altında saxlamağa çalışanlara konstitusiyamızın tələbinə uyğun hərəkətə keçdiyimizi göstərdik. Azərbaycan Respublikası Ekologiya və Təbii Sərvətlər Nazirliyi, “Azərsu”- ASC və digər qurumların ardından digər dövlət qurumları da hərəkət etməlidir”.
Qarabağdakı erməni vətəndaşlarımıza və davam edən sülh danışıqlarına toxunan Qorxmaz İbrahimli qeyd edib: “Qarabağda yaşayan ermənilərə ötən il qaz məsələsi ilə bağlı siqnal verilib. Bu sülhə doğru inamla atılmış addımdır. Rusiya başda olmaqla digər sülhdə maraqlı olmayan qüvvələr nizamlanma prosesinə mane olmaq istəsə də, sonda erməni vətəndaşlarımız Azərbaycan Respublikasının qanunlarına tabe olacaq. Ermənilər Azərbaycan Respublikasının Konstitusiyasına əməl edəcəksə, gedişat hər zaman müsbətə doğru dəyişəcək. Sülh istəməyən və sülhə mane olan qüvvələr qanuni şəkildə bölgədən uzaqlaşdırılmalıdır”.
Busaat.az/Nəsimi Ələsgərli
