Bakıda Türk Dövlətləri Təşkilatının (TDT) kənd təsərrüfatı üzrə İşçi Qrupunun 3-cü iclası keçirilib.
Busaat.az Azərbaycan Kənd Təsərrüfatı Nazirliyinə istinadən xəbər verir ki, iclasda TDT-nın kənd təsərrüfatı nazirlərinin 2-ci Toplantısına son hazırlıq işləri, təşkilata üzv ölkələr arasında aqrar sahədə əməkdaşlıq perspektivləri müzakirə olunub.
Kənd Təsərrüfatı Nazirliyinin Aparat rəhbəri Azad Cəfərli sabah Bakıda keçiriləcək TDT Kənd Təsərrüfatı Nazirlərinin 2-ci iclası və Türk Aqro Biznes Forumunun üzv dövlətlər arasında mühüm platforma rolunu oynayacağını, bu platformanın qarşılıqlı faydalı beynəlxalq əməkdaşlığın yeni perspektivli forma və istiqamətlərinin müəyyənləşdirilməsinə mühüm töhfə verəcəyini vurğulayıb. Aparat rəhbəri əlavə edib ki, Ermənistanın 30 illik işğal siyasətinə son qoyulması regionda yeni layihələrin həyata keçirilməsinə zəmin yaradıb. A. Cəfərli qeyd edib ki, işğaldan azad olunmuş ərazilərdə dağıdılaraq məhv edilmiş aqrar fəaliyyətin yenidən bərpası və inkişafı əsas hədəflərdəndir.
Tədbirdə çıxış edən TDT Baş katibinin müavini Ömər Kocaman aqrar sahənin TDT ölkələri arasında əməkdaşlıq üçün strateji sahələrdən olduğunu və mövcud imkanlardan faydalanmağın vacib olduğunu diqqətə çatdırıb.
İşçi Qrupun üzvləri TDT-nin kənd təsərrüfatı üzrə İşçi Qrupunun 2-ci iclasının nəticələri, İşçi Qrupun nəzdində yaradılan alt işçi qrupların fəaliyyət planlarını müzakirə ediblər.
Toplantıda Macarıstan və Türkiyədə təşkil olunacaq təlim proqramları və seminarların mövzuları, fövqəladə hallar zamanı ərzaq təchizatını təmin etmək üçün regional ərzaq təhlükəsizliyi ehtiyatı sisteminin yaradılması imkanları, aqrar sahədə konkret layihələrin müəyyənləşdirilməsi və icrası məsələləri ətrafında fikir mübadiləsi aparılıb.
İşçi Qrupun iclasında TDT-nın Kənd Təsərrüfatı Nazirlərinin II Toplantısının Yekun Bəyannaməsinin layihəsi də müzakirə olunub.
İştirakçılar Türk Dövlətləri Təşkilatının Kənd Təsərrüfatı Nazirlərinin III iclasının və kənd təsərrüfatı üzrə İşçi Qrupunun 4-cü iclasının tarixi və yeri barədə ilkin razılığa gəliblər.
Həmçinin, tədbirdə TDT-nin nəzdində yaradılan Quraqlığın Qarşısının Alınması İnstitutunun ilk iclası haqqında Katibliyin hesabatı dinlənilib, Macarıstanın İxracın Təşviqi Agentliyinin (HEPA), Kənd Təsərrüfatı və Təbiət Elmləri Universitetinin (MATE) su resurslarının və suvarma sistemlərinin idarə edilməsi, kənd təsərrüfatı və mühəndisliyin inkişafı proqramları, TDT ölkələrinin müvafiq qurumları arasında əməkdaşlıq imkanları ilə bağlı təqdimat keçirilib.
