Seperatçıların qondarma dövlətinin “dövlət naziri” Ruben Vardanyan Qarabağın topdan və pərakəndə ticarətlə məşğul olan biznes subyektləri, o cümlədən restoran və ictimai iaşə obyektlərinin sahibləri və nümayəndələri ilə onların problemlərini dinləmək və problemlərin həll edilməsi imkanlarını müzakirə etmək məqsədilə görüşlər keçirib.
Busaat.az xəbər verir ki, bu barədə “dövlət naziri”nin informasiya və ictimaiyyətlə əlaqələr şöbəsindən məlumat verilib.
“Dövlət naziri” iş adamlarına anlayışlarına və ləyaqətli davranışlarına görə təşəkkür edib, mal qıtlığı şəraitində Qarabağda inflyasiya əlamətlərinin olmadığını qeyd edib.
“Bilirəm ki, siz çətin şəraitdə işləyirsiniz və müxtəlif məsələlərin həlli yollarını tapmalısınız. Fikirlərinizi, daha düzgün qərarlar qəbul etməyimizə kömək edəcək təkliflərinizi səbirsizliklə gözləyirəm. Mübaliğəsiz deməliyəm ki, biz kifayət qədər çətin vəziyyətdəyik. Lakin biz hakimiyyət və xalq olaraq birlikdə bu çətinlikləri keçəcəyik. Bunun öhdəsindən gəlməyin başqa yolu yoxdur. Bunun üçün qarşılıqlı anlaşma, bir-birinə hörmət, şəffaf iş çox vacibdir ki, sizdə ədalətsizlik hissi olmasın; Bu, bizim üçün prinsipial yanaşmadır” – deyə, Vardanyan bildirib.
O vurğulayıb ki, “Artsax” hökuməti istənilən rəyi və təklifi dinləməyə, səhvləri müzakirə etməyə və düzəltməyə və bu reallıqlarda ən optimal həll yollarını birlikdə tapmağa açıqdır.
Busaat.az
