ABŞ ən yüksək kredit reytinqindən məhrum edildi

“Moody’s Ratings” beynəlxalq reytinq agentliyi ABŞ-nin dövlət borcunun və büdcə kəsirinin artması ilə bağlı narahatlıqlarla bağlı ölkənin uzunmüddətli kredit reytinqini “Aaa”dan “Aa1″ə endirib.

Busaat.az xəbər verir ki, bu barədə interfax.ru məlumat verib.

Beləliklə, “Moody’s” dünyanın ən böyük iqtisadiyyatını ən yüksək reytinqdən məhrum edən reytinq agentliklərinin “böyük üçlüyündə” sonuncudur. Bundan əvvəl “S&P Global Ratings” və “Fitch Ratings” də eyni şeyi etmişdilər.

Reytinq üzrə proqnoz “mənfi”dən “stabil”ə dəyişdirilib.

“Biz ABŞ-nin iqtisadi və maliyyə baxımından əhəmiyyətli gücünü tanıyırıq, lakin hesab edirik ki, bu üstünlüklər artıq büdcə göstəricilərinin pisləşməsini tam kompensasiya etmir”, – deyə “Moody’s”in press-relizində bildirilib.

ABŞ federal büdcəsinin illik kəsiri təxminən 2 trilyon dollar və ya ABŞ ÜDM-in 6%-dən çoxunu təşkil edir. Konqresin Büdcə idarəsi (Congressional Budget Office, CBO) hesab edir ki, milli borc 2029-cu ilə qədər ÜDM-in 107%-nə çata bilər ki, bu da İkinci Dünya Müharibəsindən bəri ən yüksək göstəricidir.

“Moody’s”in ABŞ-nin reytinqini aşağı salmaq qərarı Tramp Administrasiyasının tənqidinə səbəb olub.