“Ukraynada 100 mindən çox rus əsgəri ölüb və ya yaralanıb”.
Busaat.az xəbər verir ki, bu barədə ABŞ-ın Baş Qərargah rəisi general Mark Milley bildirib.
Nyu-Yorkda “The Economic Club” təşkilatında çıxış edən Milley Rusiyanın müharibənin əvvəlində ələ keçirdiyi Ukraynanın Xerson şəhərindən geri çəkildiyini və qışda müharibədə yaşanacaq çətinliklərin hər iki ölkəyə sülh danışıqları aparmaq imkanı verə biləcəyini bildirib. Rusiyanın Xersonda tam geri çəkilməsinin bir neçə həftə çəkə biləcəyini ifadə edən Milley, rusların geri çəkilmək məqsədlərinin həmin qoşunları yazda təşkil ediləcək hücumuna hazırlamaq olduğuna diqqət çəkib.
“Mən inanıram ki, onlar bunu qüvvələrini qorumaq, müdafiə xətlərini bərpa etmək üçün ediblər. Rusiya ilə Ukrayna arasında 9 aydır davam edən müharibədə 40 min dinc Ukrayna vətəndaşı və 100 mindən çox rus əsgəri ölüb və ya yaralanıb” – deyə, Milley qeyd edib.
Qeyd edək ki, daha əvvəl Rusiya Müdafiə Nazirliyi Xerson şəhərindəki müdafiə xəttinin Dnepr çayının sol sahilinə çəkiləcəyini açıqlayıb.
Busaat.az
