Afrika İttifaqı Sülh və Təhlükəsizlik Şurası (PSC) Qərbi Afrika Dövlətləri İqtisadi Birliyinin (ECOWAS) Nigerdə sülh yolu ilə nizam-intizamı bərpa etmək səylərini dəstəkləyir.
Busaat.az xəbər verir ki, bu barədə Al Arabiya məlumat yayıb.
“Biz ECOWAS-ın Nigerdə diplomatik vasitələrlə nizam-intizamın bərpası üzrə hərəkətlərini dəstəkləyirik”, – hesabatda deyilir.
Bu arada, təşkilat Nigerə hərbi müdaxilə üçün ECOWAS qüvvələrinin potensial istifadəsinin nəticələrini qiymətləndirdiyini vurğulayır.
Sülh və Təhlükəsizlik Şurası həmçinin beynəlxalq ictimaiyyəti Nigerdəki hərbi çevrilişin legitimliyini tanımamağa çağırıb.
Xatırladaq ki, iyulun sonunda Niger prezident qvardiyasının bir qrup hərbi zabiti qiyam edərək prezident Məhəmməd Bazumu hakimiyyətdən uzaqlaşdırdı. Ölkəni idarə etmək üçün qvardiya komandiri Abdurahmane Tçianinin rəhbərlik etdiyi Vətənin Mühafizəsi üzrə Milli Şura yaradıldı. Qərbi Afrika Dövlətləri İqtisadi Birliyinin (ECOWAS) liderləri Nigerə qarşı sərt sanksiyalar tətbiq etdilər və üsyançılardan güc tətbiq etməklə hədələyərək Bazumun azad edilməsini istədilər.
Avqustun 18-də ECOWAS-ın Siyasi Məsələlər, Sülh və Təhlükəsizlik üzrə komissarı Abdel-Fatau Musah icmanın hərbi qərargah rəislərinin görüşündən sonra Nigerə hərbi müdaxilənin başlaması üçün dəqiq tarixin hələ müəyyən edilmədiyini söylədi.
