“12 ay ərzində Ağdamda aparılan minatəmizləmə, yenidənqurma və infrastruktur layihələrinin həcmi məni heyrətləndirdi”.
Busaat.az xəbər verir ki, bunu “MAG” təşkilatının regional direktoru Adam Komarovski jurnalistlərin suallarını cavablandırarkən qeyd edib.
O bildirib ki, minatəmizləmə fəaliyyəti üzrə beynəlxalq konfrans olduqca əhəmiyyətlidir: “Bu konfrans vasitəsilə Azərbaycanda minatəmizləmə və minalarla bağlı son vəziyyəti öyrənəcəyik. Azərbaycan hökuməti tərəfindən çox böyük həcmdə işlər görülüb. Burada bizim təşkilat və digər təşkilatlar tərəfindən Azərbaycana minatəmizləmə prosesində necə kömək edəcəyimizin imkanlarını nəzərdən keçiririk”.
Komarovski qeyd edib ki, ötən ilin aprelində Ağdamda olub, bu il də oraya səfər etmək imkanı əldə edib: “Ağdamda aparılan yenidənqurma və infrastruktur layihələrinin həcmi məni heyrətləndirdi. Biz şirkət olaraq ANAMA-nın 20 əməkdaşına təlimlər keçirik. Bizim 2 beynəlxalq ekspertimiz hazırda Horadizdə fəaliyyət göstərir”.
