Avropa Birliyi (AB) Ədalət Məhkəməsi terror təşkilatı PKK-nın AB-nin terror siyahısından çıxarılması tələbi ilə bağlı iddiada mənfi qərar qəbul edib.
Busaat.az xəbər verir ki, Mərkəzi Lüksemburqda yerləşən AB Ədalət Məhkəməsinə bağlı olan Aİ Ümumi Məhkəməsi PKK-nın ötən il açdığı iddia ilə bağlı əsaslandırılmış qərarını açıqlayıb.
“Terror aktı” və “terror qruplaşması” ifadələrinin tərif edildiyi qərarda Böyük Britaniyanın 2014-cü il və ABŞ-ın 1997 və 2001-ci illərdə PKK-nı qadağan edən qərarlarına istinad edilərək, təşkilatın “terror təşkilatı” olduğu yenidən təsdiqlənib.
Qərarda PKK-nın hərəkətlərinin “Kürd xalqının öz müqəddəratını təyinetmə hüququ” çərçivəsində sayıla bilməyəcəyi və bu hüququn ümumi şəkildə həyata keçirilməsi üçün silahlı gücə müraciət edilməsinin qanuni sayıla bilməyəcəyi bildirilib.
Qərarda həmçinin Avropa Şurasının PKK ilə bağlı terror riskinin davam etdiyinə dair qiymətləndirməsi də təsdiqlənib.
Avropa Şurası terrorçu hesab edilən şəxslərin və təşkilatların maliyyə aktivlərinin dondurulması və ən azı 6 aydan bir maliyyə vəsaitlərinin verilməsinin qadağan edilməsi kimi sanksiyaların siyahısını nəzərdən keçirir.
Qeyd edək ki, PKK 2002-ci ildə terror siyahısına daxil edilib.
Busaat.az
