Rusiyanın Ukraynadakı hücumlarında infrastruktura dəyən ziyanlar nəticəsindəö elektrik enerjisinin kəsilməsi səbəbindən Avropa İttifaqı (Aİ) və NATO binalarında işıqlar Ukrayna xalqı ilə həmrəylik əlaməti olaraq söndürülüb.
Busaat.az xəbər verir ki, Belçikanın paytaxtı Brüsseldə Aİ Komissiyası, Avropa Şurası və Avropa Parlamenti kimi Aİ qurumları ilə yanaşı, NATO qərargahında da işıqlar söndürülüb.
“Rusiya 10 milyon ukraynalını soyuqda və qaranlıqda qoyub” – deyə, Aİ Komissiyasının bəyanatında deyilir.
Aİ-nin Ukraynaya elektrik kəsintilərinə qarşı yüzlərlə generator göndərərək dəstək verdiyi ifadə edilən açıqlamada, Ukraynaya generator verilməsi üçün başladılan kampaniyaya da dəstək ifadə edilib.
Aİ Komissiyasının sədri Ursula fon der Leyen də Rusiyanın Ukraynanı qaranlıqda saxlamaq üçün infrastrukturuna hücum etdiyini və Ukrayna prezidenti Volodimir Zelenskinin həmrəylik çağırışına cavab verdiklərini bildirib.
NATO-nun verdiyi açıqlamada Ukraynadakı xəstəxanalara generatorların verilməsi və dünyanın diqqətinin bu ölkəyə yönəldilməsi üçün başlatdığı təşəbbüsü dəstəklədiyi qeyd edilib.
Bəyanatda bildirilib ki, Ukrayna xalqı Rusiyanın infrastruktura hücumları səbəbindən çox çətin şəraitdə yaşayır və NATO müttəfiqləri Ukraynaya müxtəlif yardımlar, o cümlədən, Ukraynada yenidənqurmalar üçün lazım olan materiallar, qış geyimləri, yanacaq və generatorlar verib.
Busaat.az
