Avropa İttifaqı (Aİ) ölkələri Məhsa Əminin ölümündən sonra İranda keçirilən nümayişlərə müdaxilə edən 18 iranlı şəxs və 19 təşkilata sanksiya tətbiq etmək qərarına gəlib.
Busaat.az xəbər verir ki, bu barədə məlumat Avropa Şurasından verilən açıqlamada yer alıb.
Məlumata görə, sanksiyaların İranda insan haqları pozuntularına görə tətbiq edildiyi bildirilib.
Sanksiyaya məruz qalanlar arasında İranın gənclər və idman naziri Seyid Həmid Hazaveh Seccadi, onun bəzi müavinləri, bəzi əyalətlərin qubernatorları, dövlət mediasının əməkdaşları və İran İnqilab Keşikçiləri Ordusunun bəzi yüksək vəzifəli şəxsləri də var.
Siyahıya İran İnqilab Keşikçiləri Ordusunun ölkənin bəzi bölgələrindəki bölmələri, İran Xüsusi Polis Qüvvələri və təhlükəsizlik xidmətləri göstərən bəzi şirkətlər də daxildir.
Son sanksiyalarla Aİ-nin məhdudlaşdırıcı tədbirlər həyata keçirdiyi iranlıların sayı 164-ə, təşkilatların sayı isə 31-ə yüksəlib.
Sanksiyalar Aİ-yə səyahət qadağası, aktivlərin dondurulması və bu şəxslər və təşkilatların maliyyələşdirilməsinə qadağadan ibarətdir. Bundan əlavə, İrana ictimai təzyiq vasitəsi kimi istifadə oluna bilən bəzi materialların və izləmə cihazlarının satışı qadağandır.
