Bir qadının dul maaşı ala bilmək üçün eyni şəxslə 43 il ərzində tam 12 dəfə boşanıb yenidən evləndiyi və bu yolla ölkənin pensiya sistemindən 326 min avro mənimsədiyi aşkar edilib.
Busaat.az xarici mediaya istinadla xəbər verir ki, hadisə Avstriyada olub.
Məlumata görə, qadın ilk dəfə 1981-ci ildə həyat yoldaşını itirdikdən sonra dövlətin təmin etdiyi dul maaşını almağa başlayıb. Daha sonra özündən bir neçə yaş kiçik bir şəxslə evlənib, lakin bir müddət sonra “aralarındakı problemlər” səbəbilə boşanıb. Bu hadisədən sonra eyni şəxslə təkrar-təkrar evlənib boşanaraq hər dəfə dövlətin pensiya fondundan əlavə ödənişlər alıb.
Rəsmi araşdırmalar göstərib ki, bu müddət ərzində cütlük əslində birlikdə yaşamağa davam edib və boşanmalar sadəcə qanunlardakı boşluqlardan istifadə etmək üçün həyata keçirilib. Avstriya qanunlarına əsasən, qadın hər boşandıqdan sonra dul maaşı almağa davam edir və hər yeni evlilik üçün əlavə maddi yardım tələb edə bilirdi.
Məsələ Avstriyanın Ali Məhkəməsində araşdırıldıqdan sonra dələduzluq hərəkətləri üzə çıxıb. Məhkəmə bu davranışın hüquqi boşluqlardan sui-istifadə olduğunu təsdiqləyib. Bundan sonra polis cütlüyə qarşı “ciddi dələduzluq” ittihamı ilə cinayət işi açıb.
Hazırda bu qeyri-adi işin təfərrüatları ilə bağlı istintaq davam edir.
Zeyd Bağırzadə
