Burkina Fasoda hökumət Afrika üçün məzmun istehsal edən fransız jurnalı “Jeune Afrique”nin yayılmasını və jurnalın internet saytına girişi növbəti xəbərdarlıq edilənədək dayandırıb.
Busaat.az xəbər verir ki, bu barədə hökumət açıqlama yayıb.
Bildirilib ki, sentyabrın 25-dən jurnalın yayımı ilə yanaşı, sayta giriş də dayandırılıb.
Bəyanatda qadağaya səbəb kimi biri ötən həftə, digəri isə dünən dərc olunmuş iki məqalə göstərilib.
Açıqlamada “Burkina Fasoda ordu sıralarında gərginlik davam edir” və “Burkina Fasoda kazarmalarda narazılıq artır” başlıqlı iki məqalə ölkədə xaos yaratmaqda günahlandırılıb.
Hərbçilərin hakimiyyətdə olduğu Burkina Fasoda iyun ayında Fransanın LCI telekanalının yayımı üç ay müddətinə dayandırılıb. Apreldə “Liberation” və “Le Monde” qəzetlərinin müxbirləri deportasiya edilib.
Mart ayında isə, “France 24” yayımı, 2022-ci ilin dekabrında isə Fransız radio RFI yayımları qadağan edildi.
