Cənubi Amerika ölkəsi Çilinin mərkəzi və cənub bölgəsində həftəsonundan bəri davam edən leysan yağışları nəticəsində 3 nəfər həlak olub.
Busaat.az xəbər verir ki, bu barədə Milli Fəlakət Xidməti məlumat yayıb.
Bildirilib ki, leysan yağışların səbəb olduğu daşqınlarda indiyədək 3 nəfər ölüb, 33 min 200 nəfər isə təxliyə edilib.
Axtarış-xilasetmə işlərinin davam etdiyi O’Higgins, Maule, Nuble və Biobio bölgələrində küçələr su ilə dolduğu üçün çox sayda ev və avtomobilə ziyan dəyib.
Çili prezidenti Qabriel Boric açıqlamasında kiçik və orta sahibkarlara, eləcə də daşqınlardan zərər çəkənlərə və əkin sahələri zərər görən fermerlərə maliyyə yardımı edəcəklərini açıqlayıb.
Milli Kənd Təsərrüfatı Assosiasiyasının (SNA) prezidenti Antonio Valker yerli mətbuata verdiyi açıqlamada yağışların onların iqtisadiyyatına böyük təsir etdiyini və maddi ziyanın 300 milyon dollar civarında olduğunu bildirib.
Meteorologiyanın son məlumatlarına görə, mərkəzi və cənub rayonlarında yağıntıların azalacağı gözlənilir.
