“Azərbaycanın “qırmızı xətt”i sayılan Laçın yolu ilə qanunsuz erməni birləşmələrinə sursat daşımağa risk etməzlər”.
Bunu rus hərbi kontingentinin humanitar yardım maşınlarında silah daşınması ehtimalından danışan hərbi ekspert Elxan Şıxəliyev Busaat.az-a açıqlamasında deyib.
O bildirib ki, indiki məqamda rus sülhməramlıların daşıdığı yüklərin təyinatının iki istiqaməti var:
“Birinci istiqamət Xocalıda yerləşən rus hərbi bazasına daşınan təminat, ikincisi isə ehtiyac duyulan qidaların və malların Qarabağa daşınmasıdır. Qeyri-qanuni qurumun rəhbərləiyinin istəyi üzərinə fəaliyyət göstərirlər. Rus hərbi kontingenti lazım olan sursatı özləri üçün daşıya bilərlər. İndiki mərhələdə Laçın yolu üzərində keçirilən aksiyalar fonunda hansısa hərbi avadanlığın ermənilərə daşınmasına risk etməzlər”.
“Avtomobillər praktiki olaraq tərəfimizdən yoxlanmadığı üçün nə daşındığı barədə söylədiklərimiz tam dəqiq olmaya bilər. Təxribat baş vermə ehtimalını təmas bölgələrindən gözləmək lazımdır. İndiki məqamda Rusiya Ermənistandan sursatın daşınmasında maraqlı deyil. Çünki riskli bir vaxtdayıq. Azərbaycanın “qırmızı xətt”i sayılan Laçın yolu ilə qanunsuz erməni birləşmələrinə sursat daşımağa risk etməzlər. Laçın koridorunda nəzarət postlarımız qurulmalıdır. Bütün daşımalar yoxlandıqdan sonra bütün ehtimallarımız sıfırlana bilər”, – ekspert qeyd edib.
Ələsgər / Busaat.az
