Türkiyə Müdafiə naziri Hulusi Akar Finlandiyanın Müdafiə naziri Antti Kaikkonen ilə görüşəcək.
Busaat.az xəbər verir ki, Akar Türkiyəyə rəsmi səfər edəcək Kaikkoneni cümə axşamı Müdafiə Nazirliyinin binasında qəbul edəcək.
Görüşdə ikitərəfli müdafiə və təhlükəsizlik məsələlərinin, həmçinin Finlandiyanın NATO-ya üzvlük prosesinin müzakirə ediləcəyi gözlənilir.
Finlandiyanın NATO-ya üzvlüyünü mətbuat mənsublarına şərh edən Akar Türkiyənin NATO-nun açıq qapı siyasətində problemi olmadığını, ancaq Türkiyənin həssaslığına hörmət edilməsi lazım olduğunu bildirib.
NATO-nun təhlükəsizlik təşkilatı olduğunu qeyd edən Akar deyib: “Terror NATO-nun ən böyük mübarizə sahələrindən biridir. Terror hal-hazırda bütün ölkələr üçün ciddi problemdir. Türkiyə birdən çox terror təşkilatına qarşı mübarizə aparan yeganə ölkədir”.
İyun ayında Madrid Zirvəsi zamanı İsveç və Finlandiyanın NATO üzvlüyü ilə bağlı üçtərəfli memorandum olduğunu xatırladan Akar deyib:
“Memorandum aydındır. İsveç və Finlandiya tərəfindən imzalanmış öhdəliklər var. Biz bildiririk ki, onlar yerinə yetirilməlidir. Biz bu memorandumun son deyil, başlanğıc olduğuna diqqət çəkirik. Bunlar həyata keçirildikdən sonra parlament qərar verəcək. Biz İsveç və Finlandiyaya kömək etməyə çalışırıq: “Eyni zamanda, İsveç və Finlandiyadakı vəziyyəti yaxından izləyirik. Təəssüf ki, hələ də bu ölkələrdə bəzi təxribat xarakterli hərəkətlərin davam etdiyini görürük”.
Busaat.az
