İngiltərə Malidəki siyasi qeyri-sabitliyi əsas gətirərək qoşunlarını bu ölkədən planlaşdırılandan daha tez çıxaracağını açıqlayıb.
Busaat.az xəbər verir ki, bu barədə İngiltərənin Müdafiə üzrə Dövlət katibi Ceyms Heappey parlamentdə millət vəkillərinə açıqlama verib.
Açıqlamada Birləşmiş Millətlər Təşkilatının (BMT) Sülhməramlı Missiyası çərçivəsində təxminən 300 ingilis əsgərininin geri çəkiləcəyi bildirilib.
“Üç il ərzində Malidə baş verən çeviriliş sülhü inkişaf etdirmək üçün beynəlxalq səyləri zəiflədib. Vaqner Qrupu kütləvi insan haqları pozuntularına səbəb olub və Mali hökumətinin Vaqner Qrupu ilə ortaqlığı regionda qalıcı sabitlik və təhlükəsizliyə xələl gətirir” – deyə, Heappey Malidəki əməliyyatı dünyanın ən təhlükəli missiyası olaraq xarakterizə edərək, 2013-cü ildən bəri burada 288 əsgərin həyatını itirdiyini bildirib.
Qeyd edək ki, daha əvvəl Fransa da 2021-ci ilin oktyabrından bəri bir neçə böhran yaşadığı Malidən çəkiləcəyini və Barkhane əməliyyatına son verəcəyini açıqlayıb.
Fransa aprelin 19-da 300-ə yaxın əsgərin yerləşdiyi Qossidən geri çəkilib.
