Birləşmiş Millətlər Təşkilatının Təhsil, Elm və Mədəniyyət Təşkilatı (UNESCO) “2021-2022-ci illərdə İfadə Azadlığı və Medianın İnkişafı üzrə Dünya Meyilləri” adlı hesabatını yayıb.
Busaat.az xəbər verir ki, hesabatda ötən il dünyada 86 jurnalistin öldürüldüyü qeyd edilib.
UNESCO-nun hesabatla bağlı bəyanatına görə, Latın Amerikası və Karib hövzəsi jurnalistlər üçün ən ölümcül region olub. Burada 2022-ci ildə 44 qətl hadisəsi baş verib.
Asiya və Sakit okean hövzəsində 16, Şərqi Avropada isə 11 qətl hadisəsi qeydə alınıb. Jurnalistlərin ən çox öldüyü ölkə 19 qətllə Meksika olub. Meksikadan sonra 10 qətllə Ukrayna və 9 qətllə Haiti yer alıb.
“Bu jurnalistlər müxtəlif səbəblərdən, o cümlədən korrupsiya, ekoloji cinayətlər, vəzifə səlahiyyətlərindən sui-istifadə, etirazlar, mütəşəkkil cinayətkarlıq, silahlı münaqişələr və ya onlar arasında ekstremizmin artması kimi həssas məsələləri işıqlandırdıqlarına görə qisas almaq məqsədilə öldürülüblər”, – deyə məlumatda bildirilir.
