Hindistanda Nipah virusundan iki nəfər ölüb
Hindistanın cənubundakı Kerala ştatında Nipah virusundan iki nəfər ölüb. Hökumətə kömək etmək və virusun yayılmasını öyrənmək üçün bölgəyə ekspertlər göndərilib.
Busaat.az xəbər verir ki, bu barədə ölkənin səhiyyə naziri Mansuk Mandaviya jurnalistlərə bildirib.
O, əyalətin Kojikode bölgəsində iki ölümün Nipah virusundan qaynaqlandığını söyləyib.
Virusa yoluxduğu güman edilən dörd nəfərdən götürülən nümunələrin sınaq üçün Pune ştatındakı Milli Virusologiya İnstitutuna göndərilib.
Nipah virusuna yoluxmuş şəxslərdə simptomlar dərhal görünməsə də, qızdırma, baş, boğaz və əzələlərdə ağrı kimi simptomlarla qripə bənzər bir vəziyyət inkişaf edə bilər. Növbəti mərhələdə başgicəllənmə, yorğunluq, şüurun dəyişməsi ilə müşahidə olunur.
Qeyd edək ki, həm heyvanlarda, həm də insanlarda xəstəliyə səbəb olan viral infeksiya olan Nipah virusu ilk dəfə Malayziyanın Nipah bölgəsində epidemiya ilə başlayıb.
