“ABŞ-ın Yəməndəki vətəndaş müharibəsində mərkəzi hökumətə qarşı mübarizə aparan Husiləri “terror təşkilatı” elan etmə qərarı Yəmən məsələsinin siyasi həlli prosesinə mənfi təsir göstərəcək”.
Busaat.az “Anadolu” agentliyinə istinadən xəbər verir ki, bu bəyanatla Rusiya xarici işlər naziri Sergey Lavrov Səudiyyə Ərəbistanın XİN rəhbəri Faysal bin Fərhan Əl-Səudla Moskvada görüşün ardından təşkil olunan mətbuat konfransında çıxış edib.
Mətbuat konfransında Yəmən məsələsindən söz açan Lavrov bu ölkədə yeni hökumətin qurulmasını məmnuniyyətlə qarşıladıqlarını vurğulayıb:
“Birləşmiş Millətlərin Yəməndəki Husilərin silahlı “Ənsarullah” qruplaşması ilə siyasi problemlər barədə dialoq qurmaq istiqamətindəki təşəbbüslərini dəstəkləyirik. Dialoq prosesinə mane olmaq istəyənlər var”.
Rusiya XİN rəhbəri dekabrın 30-da Yəmən Nazirlər Kabineti üzvlərinin Səudiyyə Ərəbistanına gedərkən Ədən Hava Limanında partlayış baş verdiyini də xatırladıb.
Lavrov ABŞ-ın Yəməndəki vətəndaş müharibəsində mərkəzi hökumətə qarşı mübarizə aparan Husiləri “terror təşkilatı” elan etmə qərarından da söz açıb:
“Siyasi prosesin zərər görməsini istəmirəm. Ancaq Birləşmiş Millətlər təmsilçiləri də daxil olmaqla, bir çoxumuz mənfi təsirlərin formalaşa biləcəyindən narahatıq”.
Faysal bin Fərhan Əl-Səud isə sözügedən qərarın siyasi prosesə Yəməndəki Husilərin aksiyaları qədər təsir etməyəcəyini bildirib.
“Husilər mütəmadi olaraq həll prosesini baltalayır. Bunların aksiyaları İran tərəfindən dəstəklənir. İran da daxil olmaqla, xarici güclər Yəməndəki Husilərə ballistik raketlər və silahlar göndərir”, – deyə o əlavə edib.
