İndoneziyanın Şərqi Yava əyalətində 3676 metr hündürlükdə olan Semeru vulkanı püskürüb.
Busaat.az xəbər verir ki, bu barədə məlumatı İndoneziya Milli Fəlakətlərin İdarə Edilməsi Agentliyinin sözçüsü Əbdül Muhari verib.
Muhariyə görə, püskürməyə musson yağışları səbəb olub. Vulkanın kraterindən 1500 metr yüksəkliyə qədər sıx kül və tüstünün püskürdüyü, lava kütləsinin vulkanın yamacından çaya çatdığı bildirilib.
Vulkan bölgəsinə yaxın bəzi qəsəbələrin kül buludu ilə örtüldüyü, lakin tələfatın olmadığı bildirilib.
Səlahiyyətlilər yüzlərlə insanın təhlükəsiz ərazilərə təxliyə edildiyini və həyəcan səviyyəsinin ən yüksək səviyyəyə qaldırıldığını bildirib.
İndoneziyada vulkan siqnalizasiya sistemi 4 səviyyədən ibarətdir: “yaşıl”, “sarı”, “narıncı” və “qırmızı”. Qırmızı səviyyə ən yüksək səviyyə hesab olunur.
Qeyd edək ki, Semeru vulkanı 4 dekabr 2021-ci ildə də püskürüb. Bu zaman vulkan püskürməsi nəticəsində 51 nəfər ölüb.
İndoneziyada 130-a yaxın aktiv vulkan var.
Busaat.az
