İranın paytaxtı Tehranın şimal-qərbindəki Kərəc həbsxanasında qarşıdurma baş verib. Hadisələr zamanı bir məhbusun öldüyü, çoxlu sayda məhbusun yaralandığı bildirilib. Norveç mərkəzli İran İnsan Haqları Təşkilatı isə, Kərəc Mərkəzi Həbsxanasının 4-cü palatasındakı məhbusların üsyana başladığını açıqlayıb.
Busaat.az İranın rəsmi xəbər agentliyi İRNA-ya istinadən xəbər verir ki, Əlburz əyalətinin baş prokuroru Hüseyn Fəzli Herikəndi mövzu ilə bağlı açıqlama verərək, Kerac Mərkəzi Həbsxanasında narkotik cinayətkarlarının saxlandığı palatada məhbuslar arasında qarşıdurma yaşandığını bildirib.
Herikəndi münaqişə zamanı bir məhbusun digər məhbusların daş atması nəticəsində həyatını itirdiyini, çoxlu sayda məhbusun yaralandığını bildirib. Toqquşmaların təhlükəsizlik qüvvələrinin müdaxiləsi ilə başa çatdığını deyən İranın baş prokuroru yaralılardan bəzilərinin həbsxanada müalicə olunduğunu, vəziyyəti ağır olan 2 məhbusun isə xəstəxanaya köçürüldüyünü qeyd edib.
Digər tərəfdən, Norveç mərkəzli İran İnsan Haqları Təşkilatı Kərəc Mərkəzi Həbsxanasının 4-cü palatasındakı məhbusların üsyana başladığını açıqlayıb.
Qurumun məlumatına görə, ölüm hökmü çıxarılan məhbuslardan biri cəzasının icrası üçün palatadan başqa şöbəyə köçürüldükdən sonra məhbuslar və məhkumlar arasında iğtişaşlar yaranıb.
