Kreml Koreya dövlətlərini sakit olmağa çağırıb

 Koreya yarımadasında vəziyyət gərgindir və Kreml gərginliyin qarşısını almaq üçün tərəfləri sakit olmağa çağırır.

Busaat.az xəbər verir ki, bu barədə Kremlin sözçüsü Dmitri Peskov jurnalistlərə açıqlamasında bildirib.

“Biz hesab edirik ki, bu münaqişənin bütün tərəfləri gərginliyi daha da artıra biləcək hər hansı addımdan çəkinməlidirlər. Artıq yarımadada vəziyyət çox gərgindir” – deyə, Kreml sözçüsü qeyd edib.

“Biz hamını sakit olmağa və gərginliyin daha da artmasının qarşısını almağa çağırırıq” – deyə, Peskov əlavə edib.

Bundan əvvəl, Cənubi Koreya tərəfi zenit raketləri də daxil olmaqla, Şimali Koreya hərbçiləri tərəfindən dəfələrlə raket sınaqları həyata keçirilməsi barədə məlumat verib. Qeyd olunub ki, Şimali Koreya Yapon dənizində bufer zonada şərti hədəflərə artilleriya atəşi həyata keçirib, ümumilikdə 100-ə yaxın raket atıb. Şimali Koreyanın qısa mənzilli ballistik raketlərindən biri Cənubi Koreyanın Ullenqdo adasına yönəlib və Seulun faktiki sərhəd hesab etdiyi şimal sərhəd xəttinin cənubunda Cənubi Koreyanın ərazi sularının yaxınlığına düşüb. Şimali Koreyaya cavab olaraq, Cənubi Koreya üç raket atışı həyata keçirib.

Busaat.az