Belarus prezidenti Aleksandr Lukaşenko sentyabrın 15-də rusiyalı həmkarı Vladimir Putinlə danışıqlar aparmaq üçün Rusiyaya gedib.
Busaat.az xəbər verir ki, bu barədə BELTA xəbər agentliyi bildirib.
“Sentyabrın 14-də Belarus prezidenti Aleksandr Lukaşenko Rusiya Federasiyasına rəsmi səfərə gedib. Onun səfərinin əsas məqsədi sentyabrın 15-də Rusiya prezidenti Vladimir Putinlə danışıqlardır”, – agentlik deyib.
Qeyd olunur ki, müzakirələrdə beynəlxalq gündəm və regional məsələlər, o cümlədən iqtisadi sahədə, məsələn, sənaye, kənd təsərrüfatı və digər sektorlarda, idxalın əvəzlənməsi sahəsində birgə layihələr əsas yer alacaq.
Xəbər agentliyinin məlumatına görə, iki lider daha əvvəl razılaşdırılmış cədvələ uyğun olaraq məsləhətləşmələri planlaşdırıblar.
Lukaşenko ilə Putin arasında əvvəlki danışıqlar iyunun 23-də Sankt-Peterburqda keçirilib. İki prezident iqtisadi əməkdaşlıqdan əlavə, Rusiyanın Ukraynadakı xüsusi hərbi əməliyyatının gedişi və NATO-nun Polşada fəallaşması kimi bir çox məsələlərə toxunub.
Avqustun sonunda Belarus hökuməti Minskin Moskva ilə Rusiya krediti hesabına maliyyələşdirilə biləcək idxalı əvəz edən 12 əlavə sənaye layihəsini razılaşdırdığını qeyd edib. Belarusun baş nazirinin müavini Petr Parxomçik bildirib ki, hazırda İttifaq dövləti çərçivəsində 127 milyard rus rublu (1,3 milyard dollardan çox) dəyərində 17 investisiya layihəsi həyata keçirilir. Ümumi dəyəri 37 milyard rubl (385 milyon dollardan çox) olan daha 12 layihə isə hazırda davam edir.
