Misirdə Mərakeşdəki zəlzələ və Liviyada daşqın nəticəsində həyatını itirənlər üçün 3 günlük matəm elan edilib.
Busaat.az xəbər verir ki, bu barədə Misir Rəyasət Heyəti məlumat yayıb.
Yazılı açıqlamada prezident Əbdülfəttah əs-Sisinin bu səhər bəzi ordu komandirləri ilə görüşdüyü bildirilib. Sisinin Mərakeşdə baş verən zəlzələ və Liviyada əmələ gələn sel fəlakəti ilə əlaqədar bu ölkələrə başsağlığı verdiyi qeyd edilib.
“Mərakeş və Liviyadakı qardaşlarımızla həmrəylik məqsədilə Misirdə üç günlük matəm elan edilib”,- açıqlamada qeyd olunub.
Sisi Silahlı Qüvvələrə dərhal Mərakeş və Liviyaya həm hava, həm də dəniz yolu ilə humanitar yardım göndərilməsi və hər cür humanitar dəstəyin göstərilməsini tapşırıb.
Qeyd edək ki, Mərakeşdə baş verən zəlzələdə ölənlərin sayı 2 min 862-yə yüksəlib.
