Rusiyalı aktyor, daha çox məşhur “Kuxnya” serialından tanınan İvan Rudakov 43 yaşında vəfat edib.
Busaat.az xəbər verir ki, bu barədə onun valideynləri – rejissorlar Aleksey Rudakov və Yelena Nikolayeva feysbukda bildiriblər.
“Möcüzə baş vermədi. Bizim Vaneçka, bizim sevimli oğlumuz daha yoxdur”, – paylaşımda deyilir.
Bir gün əvvəl aktyorun valideynləri onun reanimasiyada süni tənəffüs aparatına qoşulu vəziyyətdə olduğunu bildirmişdi. Buna səbəb İ.Rudakovun 2021-ci ilin yayında keçirdiyi COVID-19 xəstəliyindən sonra ürək və ağciyərlərində yaranmış problem idi.
Qeyd edək ki, İ.Rudakov 1978-ci ildə anadan olub. Tamaşaçılara daha çox “Kuxnya” serialındakı bayker Stas, “Medium” serialındakı müstəntiq Oleq Danilov və “Lantset” serialındakı baş əməliyyatçı Aleksey Zvonaryov obrazları ilə tanışdır.
