
Meta-dan iflasa bərabər gerilik: Gəlir və xalis mənfəəti azaldı
“Facebook”, “Instagram” və “WhatsApp”ın sahibi “Meta”nın gəliri və xalis mənfəəti bu ilin üçüncü rübündə ötən ilin eyni dövrü ilə müqayisədə azalıb.
Busaat.az xəbər verir ki, Meta iyul-sentyabr dövrü üçün balans hesabatını açıqlayıb.
Müvafiq olaraq, şirkətin gəliri bu ilin üçüncü rübündə əvvəlki ilin eyni dövrü ilə müqayisədə 4% azalaraq 27,7 milyard dollara düşüb. Meta 2021-ci ilin üçüncü rübündə 29 milyard dollar gəlir əldə edib.
Şirkətin xalis mənfəəti üçüncü rübdə 52% azalaraq 4,4 milyard dollar təşkil edib. Meta 2021-ci ilin iyul-sentyabr dövründə 9,2 milyard dollar mənfəət açıqlayıb. Xatırladaq ki, şirkətin 2021-ci ilin üçüncü rübündə 3,22 dollar olan səhm üzrə mənfəəti də bu ilin eyni dövründə 1,64 dollara düşüb.
Qeyd edək ki, Metanın CEO-su Mark Zukerberq açıqlamasında qısamüddətli gəlir problemlərinə baxmayaraq, daha güclü gəlir artımına qayıtmaq üçün yeni fürsətlərin olduğunu bildirib.
Busaat.az























