“Rusiya gərginliyi daha da artırmaq üçün yalan bəhanələrdən istifadə etməməlidir”.
Busaat.az xəbər verir ki, bu barədə NATO-nun Baş katibi Yens Stoltenberq mətbuata açıqlama verib.
Stoltenberq Rusiyanı Ukraynada gərginliyi artırmaq üçün saxta bəhanələrə əl atmamaq və İranı müharibədə Rusiyaya yardım etməmək barədə xəbərdar edib.
NATO Baş katibi çıxışında Ukraynadakı müharibəyə toxunaraq, müharibənin çox mühüm mərhələdə olduğunu bildirib: “Rusiya prezidenti Vladimir Putin uğursuzluqlarına döyüş meydanında daha çox aqressivliklə cavab verdi. Rusiya indi yalan iddialar irəli sürür ki, Ukrayna öz ərazisində çirklənmiş radioloji bombadan istifadə etməyə hazırlaşır. NATO müttəfiqləri açıq şəkildə bu ittihamı inkar edirlər. Rusiya çox vaxt başqalarını günahlandırır və bundan istifadə edərək öz niyyətlərini həyata keçirir. Suriyadan nümunə götürün” -deyə, Stoltenberq Rusiyanın mülki əhaliyə, yaşayış məntəqələrinə və mülki infrastruktura hücumlar təşkil etdiyini bildirib.
Yens Stoltenberq İrana da toxunaraq, İranın son günlər Rusiyaya hərbi yardımlar etdiyini gördüklərini vurğulayıb. İranın Rusiyaya dəstəyini qəbuledilməz adlandıran Stoltenberq əlavə edib ki, heç bir ölkə Rusiyaya kömək etməməlidir.
Busaat.az
