Nigerin Mali sərhəddində törədilən terror aktı nəticəsində 29 əsgər həyatını itirib.
Busaat.az xəbər verir ki, bu barədə Niger Müdafiə Nazirliyi açıqlama yayıb.
Bildirilib ki, şimal-qərbdəki Tabatol rayonunda terror əməliyyatından qayıdan ordu hissələrinə silahlı basqın edilib.
Hücumda ilkin təsbitlərə görə, 29 əsgər həyatını itirib, 2 əsgər isə ağır yaralanıb. Çoxlu sayda terrorçu zərərsizləşdirilib.
Açıqlamada ölkədə 3 günlük milli matəm elan edildiyi bildirilib.
Bu, iyulun 26-da ordunun hökuməti ələ keçirməsindən bəri ən qanlı hücum kimi qeydə alınıb.
Avqust ayında Niger, Mali və Burkina Fasonun paylaşdığı sərhəd xəttinin Niger tərəfində yerləşən Tillaberi bölgəsində “3 ölkə sərhədi” olaraq bilinən terror hücumunda 17 əsgər həyatını itirmişdi.
Əl-Qaidə və DEAŞ-a bağlı terror qrupları Almaniyanın ərazisindən daha böyük olan Liptako Gourma kimi tanınan bu sərhəd xəttində tez-tez hücumlar təşkil edir.
