Katoliklərin ruhani lideri Papa Fransisk Allaha müraciət edərək, silahları susdurmaq gücünə malik olanları maarifləndirməsini istəyib.
Busaat.az xəbər verir ki, Papa bu barədə ənənəvi Milad mesajında danışıb.
Hz. İsanın mövludunun qeyd edildiyi Milad bayramının əhəmiyyətinə toxunan Papa dünyada davam edən qarşıdurmalara toxunub: “On aylıq müharibənin səbəb olduğu dağıntılara görə bu Milad bayramını qaranlıqda və soyuqda, evlərindən uzaqda qarşılayan ukraynalı bacı və qardaşlarımıza baxın. Ya Rəbb, gəlin bütün əziyyət çəkənlərə maddi həmrəyliyimizi göstərək. Qoy Tanrı silahları susdurmaq və bu mənasız müharibəyə dərhal son qoymaq qüdrətinə malik olanları ruhlandırsın və işıqlandırsın”.
“Üçüncü dünya müharibəsini müxtəlif bölgələrdə, müxtəlif səhnələrdə yaşayan dövrümüz sülh çatışmazlığından əziyyət çəkir” – deyə, Papa bildirib.
Arxa plana keçən, lakin qarşıdurmaların hələ bitmədiyi Suriyanı düşündüyünü ifadə edən Papa deyib: “Son dövrlərdə şiddət və qarşıdurmaların artdığı, ölüm və yaralanmaların artdığı müqəddəs torpaqları da düşünək. Allaha dua edək ki, israillilər və fələstinlilər arasında dialoq və qarşılıqlı etimad yaratmaq səylərini artırsın”.
Katoliklərin ruhani lideri Yəmən, Sahel və Amerika qitəsindəki siyasi və sosial gərginlikdən narahatlığını ifadə edərək, beynəlxalq ictimaiyyətin dəstəyi ilə Livanın bərpasına ümid etdiyini bildirib.
Papa Milad bayramının Myanmar və İranda da barışığa və qan tökülməsinə son qoyacağına ümid etdiyini bildirib.
Aclıq çəkən uşaqları düşünməli olduqlarını qeyd edən Papa Fransisk, “Ukraynadakı müharibə bu vəziyyəti daha da pisləşdirdi və başda Əfqanıstan və Afrika olmaqla bütün xalqları qıtlıq təhlükəsi ilə üz-üzə qoydu. Hər müharibə aclığa səbəb olur və biz bilirik ki, bu, qidadan silah kimi istifadəyə gətirib çıxarır” – deyə, fikirlərini bildirib.
Papa qeyd edib ki, belə bir gündə mühacirləri, tənha insanları və yetim uşaqları unutmamalıdırlar.
