“Kahramanmaraşda baş verən və 10 vilayətdə dağıntılara səbəb olan 7,7 və 7,6 bal gücündə zəlzələlərin yaratdığı “əsrin fəlakəti”ndən zərər çəkən zəlzələ qurbanları üçün nə edə biləcəyimizi düşünməliyik”.
Busaat.az xəbər verir ki, bunu Papa Fransisk bildirib.
Katoliklərin ruhani lideri və Vatikanın prezidenti Papa Fransisk Vatikanın Müqəddəs Petrus meydanında hər bazar günü edilən Angelus duasından sonra çıxış edib: “Dualarımız və konkret dəstək ilə Türkiyə və Suriyada zəlzələ qurbanlarının yanında olmağa davam edirik”.
Bir televiziya proqramında zəlzələnin görüntülərini izlədiyini izah edən Papa Fransisk, “Fəlakətin görüntülərini və zəlzələdən əziyyət çəkən insanların çəkdiyi əziyyətləri gördüm. Onlar üçün dua edək, onları unutmayaq. Dua edək və onlar üçün nə edə biləcəyimizi düşünək”, – deyə əlavə edib.
Bazar ritualında Ukraynanı unutmamaları lazım olduğunu dilə gətirən Papa bu ölkədə sülh yollarının açılmasını və məsul şəxslərin bu yolla getməsini arzuladığını bildirib.
