Laçın yolu artıq 20 gündür ki, Rusiya sülhməramlı kontingentinin nəzarətindən çıxıb və problemin həlli yollarını axtarmaq lazımdır.
Busaat.az xəbər verir ki, bunu Ermənistanın baş naziri Nikol Paşinyan Rusiya Dövlət Muzeyində Rusiya prezidenti Vladimir Putinlə ikitərəfli görüşdə deyib.
“Laçın yolundakı böhran hazırda ən vacib məsələdir. Bilirsiniz ki, 20 günə yaxındır ki, bu yol blokadadır” – deyə, Paşinyan bildirib.
O xatırladıb ki, bu, Qarabağdakı Rusiya sülhməramlılarının məsuliyyət zonasına daxildir.
“Xatırlatmaq istərdim ki, Rusiya və Azərbaycan prezidentlərinin və Ermənistanın baş nazirinin üçtərəfli bəyanatına (9 noyabr 2020-ci il) əsasən, Laçın yolu Rusiya sülhməramlılarının nəzarəti altında olmalıdır. Laçın yolu boyunca maneəsiz sərnişin və yük daşımalarına zəmanət verilir. İndi məlum olur ki, Laçın yolu Rusiya sülhməramlılarının nəzarəti altında deyil. Təbii ki, bu vəziyyəti müzakirə etmək istərdim və həll üçün variantların nədən ibarət olduğunu danışmaq lazımdır” – deyə, erməni lider qeyd edib.
Paşinyan MDB-nin Sankt-Peterburqda qeyri-rəsmi sammitini təşkil etdiyinə görə Putinə təşəkkür edib və əlavə edib ki, belə görüşlər yaxşı ənənəyə çevrilir.
Busaat.az
