Peskov: "Moskva və Minsk Polşadan gələn potensial təhlükələrin keşiyindədir"

Rusiya və Belarus təxribat törətməyə qadir olan aqressiv ölkə olan Polşadan gələ biləcək təhlükələrdən ehtiyatlanır.

Busaat.az xəbər verir ki, bu barədə Kremlin mətbuat katibi Dmitri Peskov jurnalistlərə bildirib.

“Polşanın silahlanmasına gəlincə, doğrudan da, onun qonşusu olmaq belaruslu dostlarımız üçün çətindir. Ölkə kifayət qədər aqressivdir. Polşa təxribatçı fəaliyyətdən və başqa ölkələrin daxili işlərinə müdaxilədən çəkinmir”, – Kreml rəsmisi söyləyib.

“Lakin biz belaruslu dostlarımız və müttəfiqlərimizlə birlikdə Polşadan gələ biləcək hər hansı potensial təhlükənin axtarışındayıq”, – Peskov vurğulayıb.

O qeyd edib ki, Moskva və Minsk iki ölkənin təhlükəsizlik konsepsiyasının hazırlanması üzərində işi davam etdirirlər.

Belə bir sənəd üzərində iş daha əvvəl Rusiya prezidenti Vladimir Putin tərəfindən açıqlanmışdı. Onun sözlərinə görə, konsepsiya Rusiya və Belarusun xarici sərhədlərində artan gərginlik, onlara qarşı başlayan sanksiyalar və informasiya müharibəsi fonunda onların qarşılıqlı fəaliyyətinin əsas məqsədlərini əks etdirməlidir.

Bu həftənin əvvəlində Polşanın baş naziri Mateuş Moravietski dedi ki, Varşava artıq Kiyevi heç bir silahla təmin etməyəcək. O bildirib ki, ölkəsi hazırda ordusu üçün ən müasir silahlar alır və artıq böyük sifarişlər verib.