Polşanın dövlət müdafiə şirkəti PGZ Qlivitsedəki Bumar-Labedy müdafiə müəssisəsində təmir edilən 4 ədəd Leopard 2A4 tankını Ukraynaya təhvil verib.
Busaat.az xəbər verir ki, bu barədə Onet.pl agentliyi məlumat yayıb.
“Ən azı daha 4 ədəd Leopard 2A4 tank Ukraynada kiçik və orta dərəcədə zədələnib. Onlar əsaslı təmir üçün Qlivitsə göndərilib”, – agentlik bildirib.
KİV müstəqil hərbi analitiklərə istinadən xəbər verir ki, daha üç Leopard 2A4 tankı minaların üzərindən keçdikdən və ya artilleriya mərmiləri, tank əleyhinə raketlər və pilotsuz uçuş aparatları ilə vurulduqdan sonra yandıqları üçün təmir oluna bilməyib.
Onet.pl saytının məlumatına görə, Kiyev Ukrayna silahlı qüvvələrinin 33-cü mexanikləşdirilmiş briqadasına göndərilən ümumilikdə 40 ədəd Leopard 2A4 tankı alıb.
“PGZ” şirkəti bazar ertəsi təmir edilmiş bir neçə tankın Ukraynaya təhvil verildiyini desə də, lakin onların sayını açıqlamayıb.
