Polşa Slovakiya sərhədindən gələn avtomobillərin yoxlanışına başlayıb.
Busaat.az xəbər verir ki, bu barədə Polşanın daxili işlər naziri Mariuş Kaminski X sosial media hesabından məlumat yayıb.
O, açıqlamada Balkan marşrutu üzrə miqrasiya təzyiqinin artdığını bildirib.
“Sərhədçilər Polşa-Slovakiya sərhədində bu istiqamətdən gələn qeyri-qanuni mühacirləri daşıma ehtimalı olan avtobus və digər nəqliyyat vasitələrini yoxlamağa başlayıb”, – Kaminski qeyd edib.
Polşanın baş naziri Mateuş Moravyeçki son açıqlamasında, “Daxili İşlər Nazirinə Polşa-Slovakiya sərhədində mikroavtobuslar, pikaplar, sərnişin maşınları və qeyri-qanuni mühacirləri daşımaqda şübhəli bilinən avtobuslar da daxil olmaqla, sərhəd nəzarətinə başlamağı tapşırmışam” deyib.
Ötən ilin oktyabrında Polşa Belarus sərhədində tikanlı məftillərlə örtülmüş beş metrlik polad hasardan ibarət 186 kilometrlik sədd çəkib. Burada minlərlə mühacirin Polşa ərazisinə daxil olmağa cəhd göstərdiyi üçün bu ölkədən miqrasiya təzyiqi artıb.
Bundan əlavə, iyun ayında Polşa-Belarus sərhəd divarına kameralar, termal görmə nəzarəti avadanlığı və sensorlardan ibarət elektron maneə əlavə edilib.
