İsrailin blokadası səbəbilə bölgədə aclıq kritik həddə çatıb.
Busaat.az Türk medyasına istinadən xəbər verir ki, bu barədə Qəzza hökumətinin Media Ofisi Müdiri İsmail Sevabite bildirib.
Onun sözlərinə görə, İsrail Qəzza zolağında müasir dövrün şahid olduğu “ən dəhşətli sistemli aclıq forması”nı tətbiq edir.
Sevabite qeyd edib ki, 2,4 milyon insanın yaşadığı ərazidə qida, dərman və su birbaşa silah kimi istifadə olunur. Sərhədlərin bağlanması, un çatışmazlığı və fırınların fəaliyyətini dayandırması bölgəni tam qida təhlükəsizliyi böhranına sürükləyib.
O, beynəlxalq ictimaiyyəti təcili və təsirli müdaxiləyə çağıraraq, “çox gec olmadan Qəzzadakı həyat qalıqlarını xilas etmək” üçün yardımın maneəsiz çatdırılmasını tələb edib.
Xatırladaq ki, İsrail 7 oktyabr 2023-dən bu yana Qəzzaya davamlı hücumlar həyata keçirir, nəticədə 52 min 400-dən çox fələstinli həlak olub, 118 mindən çox insan yaralanıb.
Aqil Nuriyev
Busaat.az
