“İllərdir ki, davam edən bir davamız var idi. O dava ki ədalətsizliyin, haqsızlığın nümunəsi idi. Dinc əhalinin amansızca qətlə yetirildiyi, xalqımın öz torpaqlarından didərgin salındığı bir dava…
O dava ki illərdir ürəyimizdə yara idi.
İllərin yığılmışlığı, edilən haqsızlıqlar artıq son nöqtə idi. Səbir kasamız artıq daşmışdı. Ali baş komandan öz müdrikliyini göstərərək sülh yolu ilə həll olunmasını istəyirdi, çünki insanların daha da zərər görməsinin tərəfdarı deyildi. Amma onlar torpaqlarımızı onlara “bağışladığımızı” düşünürdülər, “onsuz da alan deyillər” hissinə qapılmışdılar. Hər səbrin bir sonu var. Bizə onların kiçik bir səhvləri lazım ki, hərəkətə keçək.
Elə də oldu..
Şanlı Azərbaycan Ordusu mənfur düşmənlə 44 gün qəhrəmancasına savaşıb onu diz çökdürdü. Bu 44 günlük müharibə Azərbaycan xalqının şanını-şöhrətini özünə qaytardı, xalq olaraq qürurumuzu, vüqarımızı, inamımızı özümüzə qaytardı. Bu 44 günlük Vətən müharibəsi Azərbaycan xalqının tarixində qızıl hərflərlə həkk olunub əbədi yaşayacaq. Bizlər – bugünkü nəsil xoşbəxt nəsilik ki, bu şanlı tarixin yazılmasına şahidlik etdik. Əslində bu 44 günün hər günü bir tarixdir.
Təbii ki, tarixi vərəqləyəndə şahidi olursan ki, heç bir müharibə qansız, itkisiz, şəhidsiz keçməyib. Bütün dövlətlərin hərb tarixi müharibələr, dağıntılar, insan ölümü, faciələrlə müşayiət olunur. Xüsusilə də, müharibə Vətən uğrunda olanda, işğalçıya qarşı savaşanda daha fərqli olur. 30 ilə yaxındır ki, düşmən tapdağında olan torpaqları azad etmək hər bir azərbaycanlının ən vacib arzusu və diləyi idi. Və çox sevindirici haldır ki, artıq bütün işğal altında olan torpaqlarımız azad olunub. Bu qürur duyulası hal və ali ədalətin təntənəsidir. Qarabağ Azərbaycandır!”
Orucova Fatimə, ADU
