“Yuventus”un futbolçusu Kriştiano Ronaldo üçün İtaliya A seriyasının 36-cı turunda “Sassuolo” ilə matç (3:1) əlamətdar olub.
Busaat.az “Opta”ya istinadən xəbər verir ki, sözügedən görüşdə komandasının qollarından birinin müəllifi olan portuqaliyalı hücumçu Turin təmsilçisində vurduğu qolların sayını 100-ə çatdırıb. Bununla da, o, klubun tarixində üç mövsümdə bu qədər qol vuran ilk oyunçu olub. Daha əvvəl “Yuventus”un futbolçuları bunu ən azı 4 mövsümə bacarmışdı.
Bundan başqa, Ronaldo üç fərqli komanda ilə 100 qol səddinə çatan ilk futbolçu kimi də tarixə düşüb. 36 yaşlı forvard “Real”da 450 və “Mançester Yunayted”də 118 qol vurub.
