Rusiya xarici işlər nazirinin müavini Sergey Verşinin və Çinin Rusiyadakı nümayəndəsi Zhang Hanhui Çinin qlobal təhlükəsizlik təşəbbüsünü və “Şimal axını” qaz kəmərinin təxribatı ilə bağlı beynəlxalq təhqiqatın başlanmasını müzakirə ediblər.
Busaat.az xəbər verir ki, bu barədə TASS məlumat yayıb.
“Danışıqlar zamanı tərəflər ölkələrimiz arasında BMT çərçivəsində əməkdaşlığın müxtəlif aspektlərini əsaslı surətdə nəzərdən keçiriblər və BMT-nin gündəliyinin əsas məsələləri, o cümlədən Təhlükəsizlik Şurasının islahatı üzrə əməkdaşlığın davam etdirilməsinin vacibliyi vurğulanıb. Tərəflər Pekinin Rusiya tərəfindən müsbət qiymətləndirilən qlobal təhlükəsizlik təşəbbüsünü, həmçinin 26 sentyabr 2022-ci il tarixində “Şimal axını” boru kəmərlərində baş verən partlayışla bağlı beynəlxalq təhqiqatın dərhal başlanması məsələsini ətraflı müzakirə ediblər”, – Rusiya XİN-dən bildiriblər.
Nazirliyin məlumatına görə, bu müzakirə həmişə olduğu kimi, hərtərəfli tərəfdaşlıq və strateji əməkdaşlığa əsaslanan möhkəm ikitərəfli münasibətlərə əsaslanan çoxtərəfli platformalarda Rusiya və Çinin fəaliyyətlərinin yüksək səviyyədə əlaqələndirilməsini təsdiqləyib.
Qeyd edək ki, ötən il sentyabrın 27-də “Nord Stream AG” şirkəti “Şimal axını 1” və “Şimal axını 2” qaz kəmərlərinin üç xəttində partlayış baş verməsi barədə məlumat verib. İsveç seysmoloqları sentyabrın 26-da boru kəməri marşrutu yaxınlığında baş vermiş iki partlayışı qeydə alıblar. Rusiya Baş Prokurorluğu beynəlxalq terrorizm ittihamı ilə cinayət işi açıb.
