“Moskva yetişdirdiyi iş adamları vasitəsi ilə Qarabağa vəsait ayırmağı düşünür”.
Bunu bir müddət öncə Qarabağdan gedən Vardanyanın geri dönməsi səbəbini şərh edən politoloq Vüqar Əhmədov Busaat.az-a açıqlamasında deyib.
O bildirib ki, həm Arutyunyanın, həm də Vardanyanın Rusiyaya çağırılmasını Moskvanın onları növbəti dəfə təlimatlandırmağa xidmət etdiyini düşünür:
“Xankəndi-Laçın yolunda etiraz aksiyası uzandıqca Qarabağdakı erməni əhalinin vəziyyəti getdikcə çıxılmaz duruma düşür. Vardanyanın önünün şəxsi hesabına oradakı əhaliyə dəstək olmaq şərtinin qoyulduğunu ehtimal edirəm. Vardanyan isə bunun əvəzinə Moskvadan Qarabağda daha yüksək post istəyib.
Arutyunyan Qarabağda daha çox hərbi mövcudiyyəti saxlamağa xidmət edirdi, indi isə vəziyyət dəyişib. Rusiyanın müharibə şəraitində olduğunu nəzərə alaraq Moskva yetişdirdiyi iş adamları vasitəsi ilə Qarabağa vəsait ayırmağı düşünür. Çünki bu gedişlə Ermənistanın yaxın zamanlarda artıq Qarabağa öz büdcəsindən vəsait ayırmayacağı görünür. Qarabağdakı əhalinin və sülhməramlıların təminatı üçün isə əlavə vəsait lazımdır”.
“Vardanyan Arutyunyandan fərqli olaraq daha çox beynəlxalq çıxışı olan və Qərbdə çıxış edən adamdır. Qərblə Rusiyanın indiki mürəkkəb münasibətləri fonunda Moskvaya həm Ermənistana təzyiq, həm də Qarabağda öz mövcudiyyətini saxlamaq baxımından Arutyunyan kimi fiqur lazımdır”, – deyə politoloq qeyd edib.
Ələsgər / Busaat.az
