Tsipindən Ağ Evə ÇAĞIRIŞ: “Çin və ABŞ əməkdaşlığı gücləndirməlidir”

Pekin Vaşinqtonla dinc birgə yaşayışa, qarşılıqlı hörmət və əməkdaşlığa ümid bəsləyir.

Busaat.az xəbər verir ki, bu barədə Çin lideri Si Tsipin ABŞ-Çin Münasibətləri üzrə Milli Komitənin təşkil etdiyi şam yeməyindən əvvəl müraciətində bildirib.

Çinin dövlət televiziyası CCTV dövlət başçısından sitat gətirib: “Çin yeni dövrdə qarşılıqlı hörmət, dinc birgə yaşayış və qarşılıqlı əməkdaşlıq əsasında bir-biri ilə sülh və təhlükəsizliyin yolunu tapmaq üçün Birləşmiş Ştatlar ilə işləməyə hazırdır”.

“Böyük güclər kimi Çin və ABŞ dünyaya daha çox sabitlik və əminlik gətirmək, dünyada sülhü və inkişafı təşviq etmək üçün kommunikasiya və əməkdaşlığı gücləndirməlidir” – deyə, Tsipin əlavə edib.

Qeyd edək ki, ABŞ-Çin Əlaqələri üzrə Milli Komitə mərkəzi Nyu-Yorkda yerləşən qeyri-kommersiya təşkilatı və məsləhət orqanıdır. 1966-cı ildə ABŞ və Çin arasında əməkdaşlığı inkişaf etdirmək üçün yaradılıb.

Busaat.az