Türkiyə Rusiya ilə gələcəkdə qazın daha yaxşı qiyməti ilə bağlı anlaşmağa ümid edir

Türkiyə qarşıdakı illərdə Rusiya qazı üçün daha münasib qiymətlər gözləyir və bu məsələdə “Qazprom”la anlaşmaya ümid edir.

Busaat.az xəbər verir ki, bu barədə Türkiyənin enerji və təbii sərvətlər naziri Alparslan Bayraktar brifinqdə deyib.

“Rusiya ilə tavanla bağlı razılaşmamız var idi. TTF İndeksi dəyişərsə, tavan Türkiyə qiymətini qoruyur. Əgər endirim dedikdə bunu nəzərdə tutursunuzsa, buna endirim də deyə bilərsiniz. Ancaq Türkiyə qazının qiyməti yüksəkdir. Biz bu il Qazpromdan daha münasib qiymətlər gözləyirik, çünki o, etibarlı təchizatçı, Türkiyə isə Rusiya qazının yaxşı və etibarlı istehlakçısıdır. Ancaq biz bu məsələnin rəqabət qabiliyyətini nəzərə almalıyıq, inşallah anlaşma əldə edəcəyik”, – deyə o bildirib.

“Türkiyə qaz idxalına görə 38 milyard dollar ödəyib, 40%-i Rusiyadır”, – nazir vurğulayıb.

Reuters daha əvvəl bildirib ki, Türkiyə Rusiya ilə 600 milyon dollarlıq təbii qaz ödənişlərini 2024-cü ilə qədər təxirə salmaq barədə razılığa gəlib.

Rusiya Türkiyənin əsas təbii qaz tədarükçüsüdür, çünki hər il idxal olunan qazın 40%-dən çoxunu təmin edir.