Yaponiya Rusiyaya ixracı qadağan edilən malların siyahısını genişləndirib - aviasiya, kosmik sənaye...

Yaponiya hökuməti Rusiyaya ixracı qadağan edilən malların siyahısını genişləndirərək aviasiya, kosmik sənaye və pilotsuz təyyarələr üçün komponentləri də əlavə edib.

Busaat.az xəbər verir ki, bu barədə Yaponiyanın İqtisadiyyat və Ticarət Nazirliyi bildirib.

Ukraynadakı vəziyyətlə bağlı tətbiq edilən tədbirlər aprelin 7-dən qüvvəyə minəcək. Qadağan olunmuş malların siyahısına hava şarları, planerlər, enerjisiz təyyarələr və onların komponentləri, paraşütlər, təyyarənin əyləc mexanizmləri, yerüstü uçuş hazırlığı üçün avadanlıqlar, pilotsuz uçuş aparatları daxildir.

Yaponiya hökuməti həmçinin polad və alüminium məhsulları, qazanlar, generatorlar və optik lif ixracını da qadağan edəcək.

Bundan başqa, uşaq velosipedlərinin, oyuncaqların, oyuncaq maketlərinin və tapmacaların da Rusiyaya ixracına qadağa qoyulacaq.

Qeyd edək ki, hazırda Yaponiyanın sanksiyaları Rusiyadan olan 1000-ə yaxın şəxsə və 100-ə yaxın təşkilata təsir edir.

Busaat.az